ଭବାନୀପାଟଣା, ୨୩ ଏପ୍ରିଲ ୨୦୨୫: କଳାହାଣ୍ଡି ଜିଲ୍ଲାରେ ମହିଳାଙ୍କ ସୁରକ୍ଷା ଓ ସମ୍ମାନ ସୁନିଶ୍ଚିତ କରିବା ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ସ୍ୱରୂପ, ଜିଲ୍ଲା ସମାଜ କଲ୍ୟାଣ ବିଭାଗ ଆନୁକୂଲ୍ୟରେ ଏକ ଜିଲ୍ଲାସ୍ତରୀୟ ତାଲିମ କାର୍ଯ୍ୟକ୍ରମ ଭବାନୀପାଟଣାସ୍ଥିତ ଜିଲ୍ଲା ଯୋଜନା ଓ ସମୀକ୍ଷା ବିଭାଗର ସଭାଗୃହରେ ଅନୁଷ୍ଠିତ ହୋଇଯାଇଛି। ଏହି କାର୍ଯ୍ୟକ୍ରମ ନୋଡାଲ ଅଧିକାରୀ ଏବଂ ସ୍ଥାନୀୟ ଅଭିଯୋଗ କମିଟି (LCC) ଓ ଆଭ୍ୟନ୍ତରୀଣ ଅଭିଯୋଗ କମିଟି (ICC) ସଦସ୍ୟମାନଙ୍କୁ ସଶକ୍ତ କରିବା ସହ କାର୍ଯ୍ୟସ୍ଥଳୀରେ ଲିଙ୍ଗ ସମ୍ବେଦନଶୀଳତା ପ୍ରତି ସଚେତନତା ସୃଷ୍ଟି କରିବାରେ ଏକ ମାଇଲିଖୁଣ୍ଟ ପାଲଟିଛି।
ଅତିରିକ୍ତ ଜିଲ୍ଲାପାଳ ତନ୍ମୟ କୁମାର ଦରୱାନଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ଜିଲ୍ଲାର ବିଭିନ୍ନ ବିଭାଗର ବରିଷ୍ଠ ଅଧିକାରୀ ଓ ପ୍ରତିନିଧିମାନେ ସାମିଲ ହୋଇଥିଲେ। ଉଲ୍ଲେଖଯୋଗ୍ୟ ଅତିଥିଙ୍କ ମଧ୍ୟରେ ଜିଲ୍ଲା ଆଇନ ସେବା ପ୍ରାଧିକରଣର ସଚିବ ଶୁଭ ଗୌତମ ମିଶ୍ର, ମୁଖ୍ୟ ଉନ୍ନୟନ ଓ ନିର୍ବାହୀ ଅଧିକାରୀ ଦୟାମୟ ପାଢ଼ୀ, ଅତିରିକ୍ତ ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀ ଡା. ନୀହାରେନ୍ଦ୍ର ପଣ୍ଡା, ଜିଲ୍ଲା ସମାଜ କଲ୍ୟାଣ ଅଧିକାରିଣୀ ମୁଜିବୁନ ନିଶା ପ୍ରମୁଖ ଉପସ୍ଥିତ ଥିଲେ। ଏହା ସହ ଏନଜିଓ ସଂଗଠନ, ଘରୋଇ କ୍ଷେତ୍ରର ପ୍ରତିନିଧି ଏବଂ ଶିଶୁ କଲ୍ୟାଣ କମିଟିର ସଦସ୍ୟମାନେ ମଧ୍ୟ ଏହି କାର୍ଯ୍ୟକ୍ରମକୁ ଅଧିକ ସାର୍ଥକ କରିଥିଲେ।
ତାଲିମ କାର୍ଯ୍ୟକ୍ରମରେ POSH ଆଇନ, ୨୦୧୩ର ସାରାଂଶ, ଏହାର ଆଇନଗତ ଢାଞ୍ଚା, ପରିସର ଓ ପରିଭାଷା ଉପରେ ବିସ୍ତୃତ ଆଲୋଚନା ହୋଇଥିଲା। ICC, LCC ଏବଂ ନୋଡାଲ ଅଧିକାରୀଙ୍କ ଭୂମିକା ଓ ଦାୟିତ୍ୱ ସମ୍ପର୍କରେ ଗଭୀର ବୁଝାମଣା ପ୍ରଦାନ କରାଯାଇଥିଲା। ଅଭିଯୋଗ ଦାଖଲ ଓ ସମାଧାନ ପ୍ରକ୍ରିୟାର ପର୍ଯ୍ୟାୟକ୍ରମେ ମାର୍ଗଦର୍ଶନ ସହ କାର୍ଯ୍ୟସ୍ଥଳୀରେ ଲିଙ୍ଗ ସମ୍ବେଦନଶୀଳତା ପ୍ରୋତ୍ସାହନ ଏବଂ ପ୍ରତିରୋଧକ ପଦକ୍ଷେପ ଉପରେ ଗୁରୁତ୍ୱ ଦିଆଯାଇଥିଲା।
ଏହି କାର୍ଯ୍ୟକ୍ରମର ସଂଯୋଜନା ଓ ପରିଚାଳନାର ଦାୟିତ୍ୱ ସୁରକ୍ଷା ଅଧିକାରିଣୀ ସୁଚରିତା ମହାପାତ୍ର ନିଷ୍ଠାର ସହ ତୁଲାଇଥିଲେ। ସମାପନରେ ଜିଲ୍ଲା ସଂଯୋଜକ ଦିବ୍ୟ ରଞ୍ଜନ ଯୋଷୀ ସମସ୍ତ ଅଂଶଗ୍ରହଣକାରୀ ଓ ସହଯୋଗୀଙ୍କୁ ହୃଦୟପୂର୍ଣ୍ଣ ଧନ୍ୟବାଦ ଜଣାଇଥିଲେ। ୱୁମେନ୍ ହବ କଳାହାଣ୍ଡିର କର୍ମଚାରୀମାନେ ଏହି ତାଲିମକୁ ସଫଳ କରିବାରେ ଉଲ୍ଲେଖନୀୟ ଭୂମିକା ଗ୍ରହଣ କରିଥିଲେ।
ଏହି ତାଲିମ କାର୍ଯ୍ୟକ୍ରମ ନିଶ୍ଚିତ ଭାବେ କଳାହାଣ୍ଡି ଜିଲ୍ଲାରେ ମହିଳାଙ୍କ ପାଇଁ ଏକ ସୁରକ୍ଷିତ ଓ ସମ୍ମାନଜନକ କାର୍ଯ୍ୟପରିବେଶ ଗଢ଼ି ତୋଳିବାରେ ଏକ ଦୃଢ଼ ପାହାଚ ସାବ୍ୟସ୍ତ ହେବ।
ଅଧିକ ସୂଚନା ପାଇଁ www.http//Thesatyayug.in ରେ login କରନ୍ତୁ
