କଲମପୁରରେ ବେନିୟମ ବିଦେଶୀ ମଦ ଚାଲାଣ ନେଟୱାର୍କ ଉପରେ ଅବକାରୀ ବିଭାଗର କଡା ଆକ୍ସନ: ପଦରପଡାରେ ଜବତ ହେଲା ବାଇକ ଓ ମଦ

କଲମପୁର , ୧୬ ମଇ ୨୦୨୫: କଲମପୁର ଅଞ୍ଚଳରେ ବେନିୟମ ମଦ ଚାଲାଣର ଗୁପ୍ତ ଜାଲକୁ ଭାଙ୍ଗିବା ପାଇଁ ଅବକାରୀ ବିଭାଗ ଏକ ବଡ଼ ସଫଳତା ହାସଲ କରିଛି। ଶୁକ୍ରବାର ଜୁନାଗଡ଼ ମୁଖ୍ୟ ରାସ୍ତାରେ ଚାଞ୍ଚଲ୍ୟକର ଭାବେ, ଅବକାରୀ ଅଧିକାରୀଦଳ ପଦରପଡା ନିକଟରେ ୧୯.୮ ଲିଟର ବିଦେଶୀ ମଦ ସହ ଏକ ବାଇକକୁ ଜବତ କରିଛି। ଏହି ଘଟଣା ଅଞ୍ଚଳରେ ବେନିୟମ ମଦ କାରବାରର ବିସ୍ତାରକୁ ପୁଣି ଥରେ ପ୍ରମାଣ କରିଛି। ଘଟଣା ଅନୁସାରେ, କଲମପୁରରୁ ଦାସିଗାଁ ଅଭିମୁଖେ ଓଡି ୦୮ଏସ ୨୦୪୬ ନମ୍ବର ବିଶିଷ୍ଟ ଏକ ବାଇକରେ ୪ ପେଟି ବିଦେଶୀ ମଦ ଚାଲାଣ ହେଉଥିବା ବେଳେ ଜୁନାଗଡ଼ ଅବକାରୀ ଇନ୍ସପେକ୍ଟର ଲକ୍ଷ୍ମୀପ୍ରିୟା ମଲ୍ଲିକଙ୍କ ନେତୃତ୍ୱରେ ଏକ ଟିମ୍ ଏହାକୁ ଧରିବାରେ ସଫଳ ହୋଇଛନ୍ତି। ଗୁପ୍ତ ସୂଚନା ଆଧାରରେ କାର୍ଯ୍ୟ କରୁଥିବା ଅବକାରୀ ଦଳ ବାଇକକୁ ଅନୁସରଣ କରିଥିଲେ। ଅବକାରୀ ଅଧିକାରୀଙ୍କୁ ଦେଖି ଚାଲାଣକାରୀ ବଙ୍କାପଲା ପଦରପଡା ଅଞ୍ଚଳ ଆଡ଼କୁ ଦ୍ରୁତ ଗତିରେ ପଳାଇବାକୁ ଚେଷ୍ଟା କରିଥିଲେ। କିନ୍ତୁ, ଗାଁର ଶେଷ ମୁଣ୍ଡରେ ରାସ୍ତା ନଥିବାରୁ ସେ ବାଇକ ଓ ମଦ ଛାଡ଼ି ଫେରାର ହୋଇଯାଇଥିଲେ। ଅବକାରୀ ବିଭାଗ ତୁରନ୍ତ ବାଇକ ଓ ମଦକୁ ଜବତ କରି ଏକ ମାମଲା ରୁଜୁ କରିଛି। ବିଭାଗୀୟ ତଦନ୍ତରୁ ଜଣାପଡ଼ିଛି ଯେ, ଏହି ବିଦେଶୀ ମଦ କଲମପୁରର ଏକ ସରକାରୀ ଅନୁମୋଦିତ ମଦ ଦୋକାନରୁ ବେନିୟମ ଭାବେ ଚାଲାଣ ହେଉଥିଲା। କଲମପୁର ବ୍ଲକରେ ବେନିୟମ ମଦ କାରବାର ଦିନକୁ ଦିନ ବୃଦ୍ଧି ପାଉଛି। ସରକାରୀ ଅନୁମୋଦିତ ବିଦେଶୀ ମଦ ଦୋକାନ ବ୍ୟତୀତ ଅନେକ ଗାଁରେ ଦେଶୀ ମଦ ଭାଟି ଅଣଅଧିକାରୀକୃତ ସ୍ଥାନରେ ବେନିୟମ ଭାବେ ବିଦେଶୀ ଓ ହାତତିଆରି ଦେଶୀ ମଦ ଖୁଲମଖୁଲା ବିକ୍ରି ହେଉଛି।କଲମପୁରରେ ଏକ ଦେଶୀ ମଦ ଭାଟି ଓ ଦୁଇଟି ବିଦେଶୀ ମଦ ଦୋକାନ ଥିବା ବେଳେ, ବଡ଼କୁଟ୍ରୁ, ବନ୍ଧକନା, ଭେଲାଗାଁ ଓ ମଣ୍ଡଳ ଅଞ୍ଚଳରେ ମଧ୍ୟ ଦେଶୀ ମଦ ଭାଟି ଓ ଶାଖା ଦୋକାନ ସକ୍ରିୟ ରହିଛି। ବିଜମରା ଓ ମଣ୍ଡଳରେ ଅନୁମୋଦିତ ବିଦେଶୀ ମଦ ଦୋକାନ ଥାଇ ମଧ୍ୟ, ଅନେକ ଅବୈଧ କୋଠିରେ ମଦ ବିକ୍ରି ଅନାବିଲ ଚାଲିଛି। ଏହି ବେନିୟମ କାରବାର ଯୋଗୁଁ ସରକାରଙ୍କ ରାଜସ୍ୱରେ ବଡ଼ ଧରଣର କ୍ଷତି ହେଉଛି। ଏହା ସହିତ ଅଞ୍ଚଳରେ ମଦ ନିଶା ଜନିତ ଅପରାଧ ଓ ସାମାଜିକ ଅସ୍ଥିରତା ମଧ୍ୟ ବୃଦ୍ଧି ପାଉଛି। ସ୍ଥାନୀୟ ଲୋକଙ୍କ ଅଭିଯୋଗ, ଅବକାରୀ ବିଭାଗର ନିୟମିତ ନିଗରାନୀ ଅଭାବ ଯୋଗୁଁ ମଦ ମାଫିଆମାନେ ନିର୍ଭୟରେ ଏହି କାରବାର ଚଳାଇଛନ୍ତି। ତେବେ ଇନ୍ସପେକ୍ଟର ଲକ୍ଷ୍ମୀପ୍ରିୟା ମଲ୍ଲିକ କହିଛନ୍ତି, “ଆମେ ବେନିୟମ ମଦ କାରବାରକୁ ରୋକିବା ପାଇଁ କଡ଼ା ପଦକ୍ଷେପ ନେଉଛୁ। ଏହି ଘଟଣାର ତଦନ୍ତ ଚାଲିଛି ଏବଂ ଅପରାଧୀଙ୍କୁ ଖୁବଶୀଘ୍ର ଧରାଯିବ।” ଅବକାରୀ ବିଭାଗ ଅଞ୍ଚଳରେ ନିୟମିତ ଚଢ଼ାଉ ଓ ସଚେତନତା କାର୍ଯ୍ୟକ୍ରମ ମାଧ୍ୟମରେ ଏହି ସମସ୍ୟାର ମୂଳୋତ୍ପାଟନ ପାଇଁ ପ୍ରତିଶ୍ରୁତିବଦ୍ଧ ବୋଲି ଜଣାପଡ଼ିଛି। ଏହି ଘଟଣା କଲମପୁରରେ ବେନିୟମ ମଦ କାରବାରର ଭୟାବହ ଚିତ୍ର ଉପସ୍ଥାପନ କରୁଛି। ସରକାର ଓ ସ୍ଥାନୀୟ ପ୍ରଶାସନ ଏହାକୁ ରୋକିବା ପାଇଁ ଆହୁରି କଠୋର ପଦକ୍ଷେପ ନେବାର ଆବଶ୍ୟକତା ରହିଥିବା ସାଧାରଣରେ ଦାବି ହେଉଛି।