ଧର୍ମଗଡ଼:(ସତ୍ୟଯୁଗ ମିଡିଆ ଏକ ନୂଆଁ ଦିଗନ୍ତ ନ୍ୟାୟ ଓ ସତ୍ୟ ପାଇଁ) କଳାହାଣ୍ଡି ଜିଲ୍ଲାର ଧର୍ମଗଡ଼ ଅଞ୍ଚଳରେ ବେଆଇନ ଧାନ ଚାଲାଣ ବିରୋଧରେ ପ୍ରଶାସନ କଡ଼ା ପଦକ୍ଷେପ ଗ୍ରହଣ କରିଛି। ଜୁନାଗଡ଼ ବ୍ଲକର ବାଲିଛଡ଼ା ମଣ୍ଡି ନିକଟରେ ଦୁଇଟି ଟ୍ରାକ୍ଟର ଓ ଗୋଟିଏ ପିକଅପ ଗାଡ଼ିରେ ଚାଲାଣ ହେଉଥିବା ୨୫୦ ବସ୍ତା ଧାନ ଜବତ କରାଯାଇଛି। ଏହି ଘଟଣାରେ ଧର୍ମଗଡ଼ ସରକାରୀ ଯୋଗାଣ ସହାୟକ ଦୁର୍ଗା ପ୍ରସାଦ ମାଝୀ, ଯୋଗାଣ ନିରୀକ୍ଷକ ପ୍ରଭାକର ଦୋରା ଏବଂ ଜୁନାଗଡ଼ ଯୋଗାଣ ନିରୀକ୍ଷକ ଅଲେଖ ମହିମା ଭୋଇଙ୍କ ମିଳିତ ଉଦ୍ୟମରେ ଏହି କାର୍ଯ୍ୟାନୁଷ୍ଠାନ ସମ୍ପନ୍ନ ହୋଇଛି। ମଣ୍ଡି ଆରମ୍ଭ ହେବାର ୨୫ ଦିନ ବିତିଯାଇଥିଲେ ମଧ୍ୟ କିଛି ଅସାଧୁ ବେପାରୀ ଚାଷୀଙ୍କଠାରୁ କମ ମୂଲ୍ୟରେ ଧାନ କିଣି ବେଆଇନ ଭାବେ ଚାଲାଣ କରୁଥିବା ଅଭିଯୋଗ ରହିଛି। ଏହି ପରିପ୍ରେକ୍ଷୀରେ, ମଣ୍ଡି ପରିଦର୍ଶନ ବେଳେ ଯୋଗାଣ ଅଧିକାରୀମାନେ ସନ୍ଦେହଜନକ ଗାଡ଼ିଗୁଡ଼ିକୁ ଅଟକାଇ ତଲାସୀ କରିଥିଲେ। ଉକ୍ତ ସମୟରେ ଗାଡ଼ି ମଧ୍ୟରେ ଥିବା ୨୫୦ ବସ୍ତା ଧାନ ବେଆଇନ ଭାବେ ଚାଲାଣ ହେଉଥିବା ଜଣାପଡ଼ିଥିଲା। ଅଧିକାରୀମାନେ ତୁରନ୍ତ ଗାଡ଼ିଗୁଡ଼ିକୁ ଜବତ କରି ଆବଶ୍ୟକୀୟ କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି। ଏହି ଘଟଣା ସ୍ଥାନୀୟ ଚାଷୀ ଓ ସାଧାରଣ ଜନତାଙ୍କ ମଧ୍ୟରେ ପ୍ରଶଂସା ସାଉଁଟିଛି। ଚାଷୀମାନେ କହିଛନ୍ତି ଯେ, ଏହି ପଦକ୍ଷେପ ଦଲାଲମାନଙ୍କ ଦ୍ୱାରା ଚାଷୀଙ୍କ ଶୋଷଣକୁ ନିୟନ୍ତ୍ରଣରେ ସହାୟକ ହେବ। ସାଧାରଣ ଜନତାଙ୍କ ମତରେ, ଯଦି ପ୍ରଶାସନ ଏପରି କଡ଼ା ଆଭିମୁଖ୍ୟ ଜାରି ରଖେ, ତେବେ ଦଲାଲ ରାଜ ଉପରେ ଅଙ୍କୁଶ ଲାଗିପାରିବ। ଏହି ଘଟଣା ସମ୍ପର୍କରେ ଅଧିକ ତଦନ୍ତ ଜାରି ରହିଛି। ଜବତ ହୋଇଥିବା ଧାନ ଓ ଗାଡ଼ି ସମ୍ପର୍କରେ ଆଇନଗତ କାର୍ଯ୍ୟାନୁଷ୍ଠାନ ପାଇଁ ପ୍ରଶାସନ ପକ୍ଷରୁ ପଦକ୍ଷେପ ନିଆଯାଉଛି। ଏହା ସହିତ, ଭବିଷ୍ୟତରେ ଏଭଳି ବେଆଇନ ଚାଲାଣକୁ ରୋକିବା ପାଇଁ ମଣ୍ଡି ଅଞ୍ଚଳରେ ନିରୀକ୍ଷଣ କଡ଼ା କରାଯିବ ବୋଲି ଯୋଗାଣ ଅଧିକାରୀମାନେ ସୂଚନା ଦେଇଛନ୍ତି।
ଧର୍ମଗଡ଼ରୁ ଭରତ ଦାସଙ୍କ ରିପୋର୍ଟ ସତ୍ୟଯୁଗ ମିଡିଆ
