ଖଣ୍ଡପଡ଼ା (ସତ୍ୟଯୁଗ ମିଡିଆ ଏକ ନୂଆଁ ଦିଗନ୍ତ ନ୍ୟାୟ ଓ ସତ୍ୟ ପାଇଁ) ଦାରିଦ୍ର୍ୟ ଦୂରୀକରଣ ଓ ଗରିବଙ୍କୁ ସମାଜର ମୁଖ୍ୟସ୍ରୋତରେ ସାମିଲ କରିବା ପାଇଁ କେନ୍ଦ୍ର ଓ ରାଜ୍ୟ ସରକାରଙ୍କ ଦ୍ବାରା ପ୍ରଣୀତ ଆବାସ ଯୋଜନା ଭାପୁର ବ୍ଲକରେ ପ୍ରହସନରେ ପରିଣତ ହୋଇଛି। ନୟାଗଡ଼ ଜିଲ୍ଲା ଭାପୁର ବ୍ଲକ ଅଧୀନ ବାଇଗୁଣିଆଁ ଗ୍ରାମର ଜଣେ ଅସହାୟ ବିଧବା ବୃଦ୍ଧା ବସନ୍ତ ନନ୍ଦ (୮୦) ଏହି ଯୋଜନାରୁ ବଞ୍ଚିତ ହୋଇ ଦୟନୀୟ ଜୀବନଯାପନ କରୁଛନ୍ତି। ଏକ ବିପଦଶଙ୍ଖୁଳି ଚାଳଛପର ଘରେ ସେ ତାଙ୍କର ୫୨ ବର୍ଷୀୟ ମାନସିକ ବିକୃତ ପୁଅ ଓ ଜଣେ ଅବିବାହିତ ପୁଅଙ୍କ ସହ ଅତିକଷ୍ଟରେ ଦିନ କାଟୁଛନ୍ତି। ସ୍ବାମୀ ଲୋକନାଥ ନନ୍ଦଙ୍କର ୭ ବର୍ଷ ତଳେ ମୃତ୍ୟୁ ହେବା ପରେ ବସନ୍ତ ନନ୍ଦ ଏକ ଅସହାୟ ଜୀବନ ମଧ୍ୟରେ ଅଟକି ରହିଛନ୍ତି। କିନ୍ତୁ ପ୍ରଶାସନର ଅବହେଳା ଓ ଲୋକପ୍ରତିନିଧିମାନଙ୍କ ଆନ୍ତରିକତାର ଅଭାବ ଯୋଗୁଁ ତାଙ୍କ ଜୀବନରେ ଆବାସ ଯୋଜନାର ଆଲୋକ ପହଞ୍ଚି ପାରିନାହିଁ। ଅପରପକ୍ଷେ, ସ୍ଥାନୀୟ ସୂତ୍ରରୁ ଜଣାପଡ଼ିଛି ଯେ, ବାଇଗୁଣିଆଁ ଗ୍ରାମର ଅନେକ ଆର୍ଥିକ ସ୍ବଚ୍ଛଳ ବ୍ୟକ୍ତିଙ୍କୁ ହିତାଧିକାରୀ ଭାବେ ଚୟନ କରି ଆବାସ ଯୋଜନାରେ ଘର ଯୋଗାଇ ଦିଆଯାଇଛି। ଏହା ସରକାରୀ ଯୋଜନାର ସଫଳତା ଓ ସ୍ବଚ୍ଛତା ଉପରେ ପ୍ରଶ୍ନଚିହ୍ନ ଲଗାଇଛି। ଏହି ଅନିୟମିତତା ଓ ଦୁର୍ନୀତି ସମ୍ପର୍କରେ ସ୍ଥାନୀୟ ଅଞ୍ଚଳରେ ତୀବ୍ର ଅସନ୍ତୋଷ ପ୍ରକାଶ ପାଇଛି। ଗରିବ ଓ ଅସହାୟଙ୍କ ପାଇଁ ଉଦ୍ଦିଷ୍ଟ ଯୋଜନାରେ ଏଭଳି ଅବିଚାର ନିଶ୍ଚିତ ଭାବେ ସରକାରଙ୍କ ଉଦ୍ଦେଶ୍ୟକୁ ବିଫଳ କରୁଛି। ଏହାର ସମ୍ପୂର୍ଣ୍ଣ ତଦନ୍ତ କରି ଦୋଷୀଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ସହ ବସନ୍ତ ନନ୍ଦଙ୍କ ପରି ଅସହାୟ ବ୍ୟକ୍ତିଙ୍କୁ ନ୍ୟାୟ ଦେବାକୁ ବାଇଗୁଣିଆଁ ଗ୍ରାମବାସୀ ଭାପୁର ବ୍ଲକ ଉନ୍ନୟନ ଅଧିକାରୀ ଓ ନୟାଗଡ଼ ଜିଲ୍ଲାପାଳଙ୍କୁ ଦାବି କରିଛନ୍ତି। ସରକାରଙ୍କ ଦାରିଦ୍ର୍ୟ ଦୂରୀକରଣ ଯୋଜନା କେବଳ କାଗଜପତ୍ରରେ ସୀମିତ ନ ରହି ପ୍ରକୃତ ଅସହାୟ ଓ ଗରିବଙ୍କ ଜୀବନରେ ପରିବର୍ତ୍ତନ ଆଣିବା ଆବଶ୍ୟକ। ବସନ୍ତ ନନ୍ଦଙ୍କ ଦୁଃଖ ଓ ଅସହାୟତା ସରକାରୀ ବ୍ୟବସ୍ଥାର ଅକ୍ଷମତାକୁ ଦର୍ଶାଉଛି। ଏହା ଏକ ଜାଗ୍ରତ ଘଣ୍ଟି, ଯେଉଁଥିରେ ପ୍ରଶାସନ ଓ ଲୋକପ୍ରତିନିଧିମାନେ ନିଜର ଦାୟିତ୍ବ ପାଳନରେ ଆନ୍ତରିକତା ପ୍ରଦର୍ଶନ କରିବା ଉଚିତ।
ନୟାଗଡରୁ ବିଜୟ କୁମାର ସେଠୀଙ୍କ ରିପୋର୍ଟ ସତ୍ୟଯୁଗ ମିଡିଆ
About the Author
