କଲମପୁର (ସତ୍ୟଯୁଗ ମିଡିଆ ଏକ ନୂଆଁ ଦିଗନ୍ତ ନ୍ୟାୟ ଓ ସତ୍ୟ ପାଇଁ) କଲମପୁର ପଣ୍ଡିଗାଁ ଛକରୁ ମୁଖିଗୁଡା ପର୍ଯ୍ୟନ୍ତ ୩୦ କିଲୋମିଟର ବିସ୍ତୃତ ଏହି ରାସ୍ତା ପୂର୍ତ୍ତ ବିଭାଗର ଅଧୀନରେ ରହିଛି। ଏହାର ପଣ୍ଡିଗାଁ ଛକରୁ ଚୁରାଗାଁ ପର୍ଯ୍ୟନ୍ତ ୧୪ କିଲୋମିଟର ଜୁନାଗଡ ଉପବିଭାଗର ଦାୟିତ୍ୱରେ ଥିବା ସୂଚନା ମିଳେ। ୨୦୨୩ ମସିହାରୁ ଏହି ରାସ୍ତାର ନବୀକରଣ କାର୍ଯ୍ୟ ଆରମ୍ଭ ହୋଇଥିଲେ ମଧ୍ୟ, ବିଭାଗୀୟ ଅଧିକାରୀଙ୍କ ଅବହେଳା ଓ ଠିକାଦାରଙ୍କ ମନମୁଖୀ କାର୍ଯ୍ୟ ଯୋଗୁଁ ନିର୍ମାଣ କାର୍ଯ୍ୟ ମନ୍ଥର ଓ ନିମ୍ନମାନର ହେଉଛି। ସମୟ ଅବଧି ବିତିଯାଇଥିଲେ ମଧ୍ୟ ରାସ୍ତା ନିର୍ମାଣ କାର୍ଯ୍ୟ ଏପର୍ଯ୍ୟନ୍ତ ସମ୍ପୂର୍ଣ୍ଣ ହୋଇପାରି ନାହିଁ, ଯାହା ସ୍ଥାନୀୟ ଅଞ୍ଚଳବାସୀଙ୍କ ମଧ୍ୟରେ ତୀବ୍ର ଅସନ୍ତୋଷ ସୃଷ୍ଟି କରିଛି। ବିଶେଷତଃ ବୋଦେଲବନ୍ଧ ନିକଟରେ ଏକ ପୁରୁଣା ପୋଲ ନିକଟସ୍ଥ ରାସ୍ତାରେ ନିମ୍ନମାନର ନିର୍ମାଣ କାର୍ଯ୍ୟ ଯୋଗୁଁ ଗର୍ତ ସୃଷ୍ଟି ହୋଇଛି, ଯାହା ଦୁର୍ଘଟଣାର ଏକ ବଡ଼ ଆଶଙ୍କା ସୃଷ୍ଟି କରୁଛି। ଏହି ଗର୍ତର ତୁରନ୍ତ ମରାମତି ନ ହେଲେ ଆଗାମୀ ଦିନେ ଦୁଇ ଦିନ ମଧ୍ୟରେ ଏହା ସମ୍ପୂର୍ଣ୍ଣ ଭାଙ୍ଗିଯିବାର ସମ୍ଭାବନା ରହିଛି। ଏହା କେବଳ ଯାନବାହାନ ଚଳାଚଳକୁ ବାଧାପ୍ରାପ୍ତ କରିବ ନାହିଁ, ବରଂ ଆମ୍ବୁଲାନ୍ସ ଭଳି ଜରୁରୀ ସେବାଗୁଡ଼ିକୁ ମଧ୍ୟ ବନ୍ଦ କରିଦେବ। ଫଳସ୍ୱରୂପ, ହାରାମାଲ, ବନ୍ଧକନା ପଞ୍ଚାୟତର ୭ଟି ରାଜସ୍ୱ ଗ୍ରାମ ଏବଂ ଜୟପାଟଣା ବ୍ଲକର ଆଟିଗାଁ, ବେଙ୍ଗେର, ଧାମନଗୁଡା, କନକପୁର, ପାଇକେନ୍ଦୁମୁଣ୍ଡି, ମୁଖିଗୁଡା ଆଦି ଅଞ୍ଚଳର ଯୋଗାଯୋଗ ବିଚ୍ଛିନ୍ନ ହେବାର ଆଶଙ୍କା ରହିଛି। ପୂର୍ତ୍ତ ବିଭାଗର ଅଧିକାରୀଙ୍କ ଅବହେଳା ଏବଂ ଠିକାଦାରଙ୍କ ଦାୟିତ୍ୱହୀନତା ଏହି ସମସ୍ୟାକୁ ଆହୁରି ଗମ୍ଭୀର କରିଛି। ନିମ୍ନମାନର ନିର୍ମାଣ କାର୍ଯ୍ୟ ଏବଂ ସମୟସୀମାର ଅନାଦର ଜନସାଧାରଣଙ୍କ ଜୀବନକୁ ବିପଦ ଆଡ଼କୁ ଠେଲି ଦେଉଛି। ଏହା କେବଳ ପ୍ରଶାସନିକ ବିଫଳତାର ପରିଚାୟକ ନୁହେଁ, ବରଂ ଠିକାଦାରଙ୍କ ମୁନାଫାକେନ୍ଦ୍ରୀ ମନୋଭାବର ମଧ୍ୟ ପରିଚୟ ଦେଉଛି। ଅଞ୍ଚଳବାସୀଙ୍କ ଜୀବନ ଓ ସୁବିଧାକୁ ଅଗ୍ରାଧିକାର ଦେବା ପରିବର୍ତ୍ତେ, ଏହି ଅବହେଳା ଏକ ବଡ଼ ଦୁର୍ଘଟଣାକୁ ଆମନ୍ତ୍ରଣ କରୁଛି। ଅଞ୍ଚଳବାସୀ ପୂର୍ତ୍ତ ବିଭାଗ ଓ ସମ୍ପୃକ୍ତ ଅଧିକାରୀଙ୍କୁ ଏହି ସମସ୍ୟା ପ୍ରତି ଗୁରୁତ୍ୱ ଦେଇ ତୁରନ୍ତ ପଦକ୍ଷେପ ନେବାକୁ ଦାବି କରୁଛନ୍ତି। ଗର୍ତର ମରାମତି ସହ ରାସ୍ତା ନିର୍ମାଣ କାର୍ଯ୍ୟକୁ ତ୍ୱରାନ୍ୱିତ କରି ଗୁଣାତ୍ମକ ମାନ ସୁନିଶ୍ଚିତ କରାଯାଉ। ପ୍ରଶାସନ ଓ ଠିକାଦାରଙ୍କୁ ସେମାନଙ୍କ ଦାୟିତ୍ୱ ପ୍ରତି ସଚେତନ କରାଇ ଜନସାଧାରଣଙ୍କ ସୁରକ୍ଷା ଓ ସୁବିଧାକୁ ଅଗ୍ରାଧିକାର ଦେବା ନିହାତି ଜରୁରୀ। ଏହା ନ ହେଲେ, ଏକ ବଡ଼ ଦୁର୍ଘଟଣାର ଆଶଙ୍କା ଏଡ଼ାଇ ଦିଆଯାଇ ପାରିବ ନାହିଁ।
ସ୍ବତନ୍ତ୍ର ଖବର – ରବିନ୍ଦ୍ର ମିଶ୍ର
About the Author
