କଳାହାଣ୍ଡିରେ ସରକାରୀ ଜମି ବିବାଦ: ଦଳିତ ମହିଳାଙ୍କୁ ମାଡ଼ ଓ ଜାତିଆଣ ଆକ୍ଷେପ ଅଭିଯୋଗ, ୩୧ ଜଣଙ୍କ ନାମରେ ମାମଲା

ଧର୍ମଗଡ ( ସତ୍ୟଯୁଗ ମିଡିଆ ଏକ ନୂଆଁ ଦିଗନ୍ତ ନ୍ୟାୟ ଓ ସତ୍ୟ ପାଇଁ) କଳାହାଣ୍ଡି ଜିଲ୍ଲାର କୋକସରା ଥାନା ଅନ୍ତର୍ଗତ ବେହେରା ଗ୍ରାମ ପଞ୍ଚାୟତର ଦଳସର୍ଗି ଗ୍ରାମରେ ସରକାରୀ ଜମି ଜବରଦଖଲ ବିବାଦକୁ ନେଇ ଦଳିତ ମହିଳାଙ୍କୁ ମାଡ଼ ମାରିବା ସହ ଜାତିଆଣ ଆକ୍ଷେପ କରି ଗାଳିଗୁଲଜ କରାଯାଇଥିବା ଅଭିଯୋଗ ସାମ୍ନାକୁ ଆସିଛି। ଏହି ଘଟଣାରେ ୩୧ ଜଣଙ୍କ ନାମରେ କୋକସରା ଥାନାରେ ମାମଲା ରୁଜୁ ହୋଇଛି। ସୂଚନା ଅନୁସାରେ, ଦଳସର୍ଗି ଗ୍ରାମରେ ଧନମତି ଭରତିଆ, ବୈକୁଣ୍ଠ ଭରତିଆ, ଜୟ ଭରତିଆ ଓ ଲଳିତ ଭରତିଆଙ୍କ ପରିବାର ଗତ ୫୦ ବର୍ଷରୁ ଅଧିକ ସମୟ ଧରି ନଦୀକୂଳରେ ଥିବା ସରକାରୀ ଜମିରେ ବସବାସ କରି ଚାଷବାସ କରି ଆସୁଛନ୍ତି। ଏହି ଜମି ଦେଇ ଦଳସର୍ଗି ଓ ନିକଟବର୍ତୀ କାଣ୍ଡପଡ଼ା ଗ୍ରାମବାସୀ ନଦୀକୁ ଯିବାଆସିବା, ଗାଧୋଇବା ଓ ଗାଈଗୋରୁ ନେବାଆଣିବା କରିଥାନ୍ତି। ଗତ ୨୬ ଜୁଲାଇରେ କାଣ୍ଡପଡ଼ାର କିଛି ଲୋକ ଅଭିଯୋଗକାରୀଙ୍କ ଚାଷଜମିରେ ଗାଈଗୋରୁ ମଡ଼ାଇ ଫସଲ ନଷ୍ଟ କରିଥିବା ଅଭିଯୋଗ ହୋଇଛି। ଏହାର ପ୍ରତିବାଦ କରିବା ବେଳେ କାଣ୍ଡପଡ଼ାର ୩୦ରୁ ଅଧିକ ଲୋକ ଧନମତି ଓ ତାଙ୍କ ପରିବାରର ମହିଳାଙ୍କୁ ଅଶ୍ଳୀଳ ଭାଷାରେ ଗାଳିଗୁଲଜ କରିବା ସହ ମାଡ଼ ମାରିଥିବା ଅଭିଯୋଗ କୋକସରା ଥାନାରେ ଦାୟର ହୋଇଛି। ଅଭିଯୋଗକୁ ଗମ୍ଭୀରତାର ସହ ଗ୍ରହଣ କରି କୋକସରା ଥାନା ଅଧିକାରୀଣି ସ୍ନିଗ୍ଧାରାଣୀ ସୁନା ଘଟଣାସ୍ଥଳରେ ପହଞ୍ଚି ତଦନ୍ତ କରିଛନ୍ତି। ତଦନ୍ତ ଆଧାରରେ ୩୧ ଜଣଙ୍କ ନାମରେ ମାମଲା ରୁଜୁ ହୋଇଛି। ଅନ୍ୟପଟେ, କାଣ୍ଡପଡ଼ା ଗ୍ରାମବାସୀ ପାଲଟା ଅଭିଯୋଗ କରି କହିଛନ୍ତି ଯେ, ଦଳସର୍ଗି ଗ୍ରାମବାସୀ ନଦୀକୁ ଯାଉଥିବା ରାସ୍ତା ବନ୍ଦ କରିବା ଯୋଗୁଁ ସେମାନେ ନାନା ଅସୁବିଧାର ସମ୍ମୁଖୀନ ହେଉଛନ୍ତି, ଯେଉଁଥିପାଇଁ ସେମାନେ ପ୍ରତିବାଦ କରିଥିଲେ। ଏହି ଘଟଣାର ତଦନ୍ତ ପାଇଁ ଧର୍ମଗଡ଼ ଏସଡିପିଓ ଓ ତହସିଲଦାର ଆଜି ଦଳସର୍ଗି ଗ୍ରାମରେ ପହଞ୍ଚି ଅନୁସନ୍ଧାନ କରିଛନ୍ତି। ଏସଡିପିଓ ଜଣାଇଛନ୍ତି ଯେ, ଜିଲ୍ଲାପାଳଙ୍କ ସହ ଆଲୋଚନା କରି ଉଭୟ ଗୋଷ୍ଠୀଙ୍କ ଉପସ୍ଥିତିରେ ଏକ ଶାନ୍ତି କମିଟି ଗଠନ କରାଯାଇ ବିବାଦର ସମାଧାନ କରାଯିବ। ସେହିପରି, ଦୋଷୀଙ୍କ ବିରୁଦ୍ଧରେ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ ପ୍ରକାଶ କରିଛନ୍ତି। ଏହି ଘଟଣା ସ୍ଥାନୀୟ ଅଞ୍ଚଳରେ ତୀବ୍ର ଚର୍ଚ୍ଚାର ବିଷୟ ହୋଇଛି। ଦଳିତ ମହିଳାଙ୍କୁ ଜାତିଆଣ ଆକ୍ଷେପ ଓ ମାଡ଼ ମାରିବା ଅଭିଯୋଗକୁ ନେଇ ସ୍ଥାନୀୟ ଲୋକେ ତୀବ୍ର ନିନ୍ଦା କରିଛନ୍ତି। ପ୍ରଶାସନ ଏହି ମାମଲାରେ ନିରପେକ୍ଷ ତଦନ୍ତ କରି ଦୋଷୀଙ୍କୁ ଦୃଷ୍ଟାନ୍ତମୂଳକ ଦଣ୍ଡ ଦେବାକୁ ସାଧାରଣରେ ଦାବି ହେଉଛି।

ଧର୍ମଗଡ଼ରୁ ଭରତ ଦାସଙ୍କ ରିପୋର୍ଟ ସତ୍ୟଯୁଗ ମିଡିଆ