କଳାହାଣ୍ଡିରେ ଦଳିତ ମହିଳାଙ୍କୁ ସଂଘବଦ୍ଧ ଆକ୍ରମଣ: ଏଓଏସସିଏଫ ଦାବି କଲା ଦୃଢ଼ କାର୍ଯ୍ୟାନୁଷ୍ଠାନ

ଧର୍ମଗଡ (ସତ୍ୟଯୁଗ ମିଡିଆ ଏକ ନୂଆଁ ଦିଗନ୍ତ ନ୍ୟାୟ ଓ ସତ୍ୟ ପାଇଁ) କଳାହାଣ୍ଡି ଜିଲ୍ଲାର କୋକସରା ଥାନା ଅନ୍ତର୍ଗତ ବେହେରା ଗ୍ରାମ ପଞ୍ଚାୟତର ଦଳସର୍ଗି ଗ୍ରାମରେ ସରକାରୀ ଜମିକୁ କେନ୍ଦ୍ର କରି ଦଳିତ ମହିଳାଙ୍କୁ ସଂଘବଦ୍ଧ ଭାବେ ଆକ୍ରମଣ କରାଯାଇଥିବା ଅଭିଯୋଗ ସାମ୍ନାକୁ ଆସିଛି। ଘଟଣାର ୩ ଦିନ ବିତିଯାଇଥିଲେ ମଧ୍ୟ ଅଭିଯୁକ୍ତଙ୍କୁ ଗିରଫ ନ କରାଯିବାରୁ ଅଲ ଓଡ଼ିଶା ସିଡ୍ୟୁଲ୍ଡ କାଷ୍ଟ ଫେଡେରେସନ (ଏଓଏସସିଏଫ) ଏହାର ତୀବ୍ର ନିନ୍ଦା କରି ଦୋଷୀଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ଦାବି କରିଛି। ଅଭିଯୋଗ ଅନୁସାରେ, ଦଳସର୍ଗି ଗ୍ରାମର ଧନମତି ଭରତିଆ, ପ୍ରତିମା ଭରତିଆ, ଜୟନ୍ତୀ ଭରତିଆ, ସୋନିଆ ଭରତିଆ ଓ ଧ୍ରୁବଚରଣ ଭରତିଆଙ୍କ ପରିବାର ଗତ ୫୦ ବର୍ଷରୁ ଅଧିକ ସମୟ ଧରି ନଦୀକୂଳରେ ଥିବା ସରକାରୀ ଜମିରେ ବସବାସ କରି ଧାନ ଓ ଡାଲି ଜାତୀୟ ଶସ୍ୟ ଚାଷ କରି ଜୀବିକା ନିର୍ବାହ କରୁଛନ୍ତି। ଚଳିତ ବର୍ଷ ମଧ୍ୟ ସେମାନେ ସେହି ଜମିରେ ଚାଷ କରିଥିଲେ। କିନ୍ତୁ ଗତ ୨୬ ଜୁଲାଇରେ କାଣ୍ଡପଡ଼ା ଗ୍ରାମର କିଛି ଲୋକ ଏହି ଜମିରେ ଗାଈଗୋରୁ ଛାଡ଼ି ଫସଲ ନଷ୍ଟ କରିଥିଲେ। ଏହାର ପ୍ରତିବାଦ କରିବାକୁ ଯାଇଥିବା ଦଳିତ ମହିଳାମାନଙ୍କୁ ଅଭିଯୁକ୍ତମାନେ ଅଶ୍ଳୀଳ ଭାଷାରେ ଗାଳିଗୁଲଜ କରିବା ସହ ଠେଙ୍ଗା ସାହାଯ୍ୟରେ ମରଣାନ୍ତକ ଆକ୍ରମଣ କରିଥିବା ଅଭିଯୋଗ ହୋଇଛି। ଗୁରୁତର ଆହତ ଅବସ୍ଥାରେ ପରିବାର କୋକସରା ଥାନାରେ ଅଭିଯୋଗ ଦାୟର କରିଥିଲେ। ଥାନା ଅଧିକାରୀ ସ୍ନିଗ୍ଧାରାଣୀ ସୁନା ଘଟଣାସ୍ଥଳରେ ପହଞ୍ଚି ତଦନ୍ତ କରି ୩୧ ଜଣଙ୍କ ନାମରେ ମାମଲା (କେସ ନଂ. ୧୩୫/୨୦୨୫) ରୁଜୁ କରିଛନ୍ତି। ଧର୍ମଗଡ଼ ଏସଡିପିଓ ଡୋଳାମଣି ଭୋଇ ଓ ତହସିଲଦାର କୀର୍ତ୍ତି ଚନ୍ଦ୍ର ପ୍ରଧାନ ମଧ୍ୟ ଘଟଣାସ୍ଥଳ ପରିଦର୍ଶନ କରି ତଦନ୍ତ କରିଛନ୍ତି। ତଥାପି, ଘଟଣାର ୩ ଦିନ ବିତିଯାଇଥିଲେ ମଧ୍ୟ ଅଭିଯୁକ୍ତଙ୍କୁ ଗିରଫ ନ କରାଯିବାରୁ ପୀଡ଼ିତ ପରିବାର ଓ ଏଓଏସସିଏଫ ଅସନ୍ତୋଷ ପ୍ରକାଶ କରିଛନ୍ତି। ଏହି ପରିପ୍ରେକ୍ଷୀରେ, ଏଓଏସସିଏଫର ଧର୍ମଗଡ଼ ଉପଖଣ୍ଡ ସଭାପତି ବିରଞ୍ଚି ନାରାୟଣ ଜାଲଙ୍କ ନେତୃତ୍ୱରେ ଜିଲ୍ଲାପରିଷଦ ସଦସ୍ୟ ଗୋପୀନାଥ ମହାନନ୍ଦ, ଉପଦେଷ୍ଟା ଲକ୍ଷ୍ମୀକାନ୍ତ ବାଗ, ଆଇନ ପରାମର୍ଶଦାତା ଦିଗାମ୍ବର ଦୁରିଆ, ଜିଲ୍ଲା ମହାସଚିବ ଯତୀନ୍ଦ୍ର କର, କାର୍ଯ୍ୟକାରୀ ସଭାପତି ଅଜୟ ଦୀପ, କୋଷାଧ୍ୟକ୍ଷ କୌଶିକ ଦୁରିଆ, ଜିଲ୍ଲା ଉପସଭାପତି ଧବଳେଶ୍ୱର ନାଗ, ରମେଷ ଚନ୍ଦ୍ର ଦୁର୍ଗା, ଦେବେଶ କର ପ୍ରମୁଖ ଅତିରିକ୍ତ ଜିଲ୍ଲାପାଳ ତନ୍ମୟ କୁମାର, ଅତିରିକ୍ତ ଜିଲ୍ଲା ଆରକ୍ଷୀ ଅଧିକ୍ଷକ ଶୁଭ୍ରାଂଶୁ ଶେଖର ମିଶ୍ର ଓ ଉପଖଣ୍ଡ ଆରକ୍ଷୀ ଅଧିକ୍ଷକ ଡୋଳାମଣି ଭୋଇଙ୍କୁ ଭେଟି ଦୃଢ଼ କାର୍ଯ୍ୟାନୁଷ୍ଠାନ ଦାବି କରିଛନ୍ତି। ଅଧିକାରୀମାନେ ଅଭିଯୁକ୍ତଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବେ ବୋଲି ଆଶ୍ୱାସନା ଦେବା ସହ ଗ୍ରାମରେ ଶାନ୍ତି ବଜାୟ ରଖିବା ପାଇଁ ଉଭୟ ପକ୍ଷଙ୍କୁ ଅନୁରୋଧ କରିଛନ୍ତି। ଏଓଏସସିଏଫ ଏହି ଘଟଣାକୁ ଗମ୍ଭୀରତାର ସହ ନେଇ ଦୋଷୀଙ୍କୁ ଦୃଷ୍ଟାନ୍ତମୂଳକ ଦଣ୍ଡ ଦେବା ସହ ପୀଡ଼ିତଙ୍କୁ ନ୍ୟାୟ ପ୍ରଦାନ କରିବାକୁ ଜୋରଦାର ଦାବି କରିଛି। ଏହି ଘଟଣା ସ୍ଥାନୀୟ ଅଞ୍ଚଳରେ ତୀବ୍ର ଆଲୋଡ଼ନ ସୃଷ୍ଟି କରିଛି। ସାମାଜିକ ନ୍ୟାୟ ଓ ଦଳିତ ଅଧିକାର ପାଇଁ କାର୍ଯ୍ୟ କରୁଥିବା ସଙ୍ଗଠନମାନେ ଏହାର ତୀବ୍ର ନିନ୍ଦା କରିବା ସହ ପ୍ରଶାସନକୁ ତୁରନ୍ତ ପଦକ୍ଷେପ ନେବାକୁ ଆହ୍ୱାନ ଦେଇଛନ୍ତି।

ଧର୍ମଗଡ଼ରୁ ଭରତ ଦାସଙ୍କ ରିପୋର୍ଟ ସତ୍ୟଯୁଗ ମିଡିଆ