କଲମପୁର ୨୩/୦୪/୨୦୨୫(ବୁଧବାର)
କଳାହାଣ୍ଡି ଜିଲ୍ଲାର କଲମପୁର ବ୍ଲକରେ ଗରିବ ଶ୍ରମିକ ପରିବାରଙ୍କ ଆର୍ଥିକ ସଶକ୍ତିକରଣ ଓ ଜୀବନଧାରାର ଉନ୍ନତି ପାଇଁ ମନରେଗା ଯୋଜନା ଏକ ସଫଳ ମାଧ୍ୟମ ହୋଇପାରିଛି। ଏହି ଦିଗରେ ଆଉ ଏକ ପାଦ ଆଗକୁ ବଢ଼ାଇ ଚଳିତ ଆର୍ଥିକ ବର୍ଷ ୨୦୨୫-୨୬ ପାଇଁ ବ୍ଲକ ପ୍ରଶାସନ ବୁଧବାର (୨୩ ଅପ୍ରେଲ ୨୦୨୫) ସଦଭାବନା ଗୃହରେ ଏକ ଗୁରୁତ୍ଵପୂର୍ଣ୍ଣ ପ୍ରସ୍ତୁତି ବୈଠକ ଆୟୋଜନ କରିଥିଲା। ଏହି ବୈଠକରେ ମେଟ୍, ଗ୍ରାମ ରୋଜଗାର ସେବକ,ସହକାରୀ ଡାଟାଏଣ୍ଟ୍ରି ଅଧିକାରୀ, ଟେକ୍ନିକାଲ ଅଧିକାରୀଙ୍କ ସମେତ ବିଭିନ୍ନ ଅଧିକାରୀ ଓ କର୍ମଚାରୀ ଅଂଶଗ୍ରହଣ କରି ମନରେଗାର ସଫଳ ରୂପାୟନ ପାଇଁ ରଣନୀତି ପ୍ରସ୍ତୁତ କରିଥିଲେ।
ବୈଠକରେ ଚଳିତ ଆର୍ଥିକ ବର୍ଷରେ ୨,୭୫,୦୦୦ ଶ୍ରମ ଦିବସ ସୃଷ୍ଟି କରିବାର ମହତ୍ଵାକାଂକ୍ଷୀ ଲକ୍ଷ୍ୟ ନିର୍ଦ୍ଧାରଣ କରାଯାଇଛି। ଏହା ମାଧ୍ୟମରେ ଗରିବ ଶ୍ରମିକ ପରିବାରଙ୍କୁ ନିଯୁକ୍ତି ସୁଯୋଗ ସୃଷ୍ଟି କରି ସେମାନଙ୍କ ଜୀବନରେ ଆର୍ଥିକ ସ୍ବାବଲମ୍ବନ ଓ ସମୃଦ୍ଧି ଆଣିବାକୁ ଯୋଜନା କରାଯାଇଛି। ବର୍ତ୍ତମାନ କଲମପୁର ବ୍ଲକରେ ୧୦,୦୧୭ଟି ପରିବାର ଜବକାର୍ଡ ଧାରଣ କରିଥିବା ବେଳେ ୫,୮୫୨ଟି ପରିବାର ସକ୍ରିୟ ଶ୍ରମିକ ଭାବେ କାର୍ଯ୍ୟ କରୁଛନ୍ତି। ବ୍ୟକ୍ତିଗତ ସ୍ତରରେ ୧୭,୧୩୪ ଜଣ ଶ୍ରମିକ ପଞ୍ଜିକୃତ ଥିବା ବେଳେ ୮,୮୮୨ ଜଣ ସକ୍ରିୟ ଭାବେ କାମରେ ନିୟୋଜିତ ଅଛନ୍ତି। ଏହା ମଧ୍ୟରେ ଅନୁସୂଚିତ ଜାତିର ୧୩.୨% ଏବଂ ଅନୁସୂଚିତ ଜନଜାତିର ୨୭.୪% ଶ୍ରମିକ ସାମିଲ ରହିଛନ୍ତି, ଯାହା ସାମାଜିକ ସମାବେଶୀକରଣର ଏକ ଉଜ୍ଜ୍ୱଳ ଉଦାହରଣ।
ଗତ ଆର୍ଥିକ ବର୍ଷ ୨୦୨୪-୨୫ରେ କଲମପୁର ବ୍ଲକ ୧,୩୧,୬୪୩ ଶ୍ରମ ଦିବସ ସୃଷ୍ଟି କରି ଜିଲ୍ଲାରେ ଏକ ଆଦର୍ଶ ସ୍ଥାପନ କରିଛି। ଏହି ଅବଧିରେ ୫,୦୦୬ ଜଣ ବ୍ୟକ୍ତିଗତ ପ୍ରକଳ୍ପ ଏବଂ ୧,୩୦୯ଟି ଗୋଷ୍ଠୀ ପ୍ରକଳ୍ପ ମାଧ୍ୟମରେ ହିତାଧିକାରୀ ହୋଇଛନ୍ତି। ଏହି ପ୍ରକଳ୍ପଗୁଡ଼ିକ ଶ୍ରମିକ, କୃଷକ ଏବଂ କ୍ଷୁଦ୍ର ଉଦ୍ୟାନ କୃଷି ସହ ଜଡ଼ିତ ପରିବାରଙ୍କ ଜୀବନରେ ଆର୍ଥିକ ସ୍ଥିରତା ଆଣିବାରେ ଗୁରୁତ୍ଵପୂର୍ଣ୍ଣ ଭୂମିକା ଗ୍ରହଣ କରିଛି।
ଚଳିତ ବର୍ଷରେ ଅଧିକ ସଂଖ୍ୟକ ଜବକାର୍ଡ ଧାରୀ ପରିବାରଙ୍କୁ ମନରେଗା ଯୋଜନାରେ ସାମିଲ କରିବା ପାଇଁ ମେଟ୍ ଓ ଅନ୍ୟାନ୍ୟ ଅଧିକାରୀଙ୍କ ସହ ବିସ୍ତୃତ ଆଲୋଚନା ହୋଇଛି। ଏହି ବୈଠକରେ ଗୋଷ୍ଠୀ ଉନ୍ନୟନ ଅଧିକାରୀ ବିଜୟ କୁମାର ମାଡାଙ୍ଗି, ସହକାରୀ ଯନ୍ତ୍ରୀ କିରଣ କୁମାର ଷଣ୍ଢ ଏବଂ କନିଷ୍ଠ ଯନ୍ତ୍ରୀ ପିତାମ୍ବର ହେମ୍ବ୍ରମଙ୍କ ସମେତ ଅନେକ ବରିଷ୍ଠ ଅଧିକାରୀ ଉପସ୍ଥିତ ଥିଲେ।
ଏହି ଉଦ୍ୟମ କଲମପୁର ବ୍ଲକରେ ଗରିବ ଶ୍ରମିକ ପରିବାରଙ୍କ ଜୀବନରେ ଆଲୋକର ନୂଆ କିରଣ ଆଣିବ ବୋଲି ଆଶା କରାଯାଉଛି। ମନରେଗା ମାଧ୍ୟମରେ ସୃଷ୍ଟ ଏହି ସୁଯୋଗ ନିଶ୍ଚିତ ଭାବେ ସେମାନଙ୍କୁ ଆର୍ଥିକ ସ୍ବାବଲମ୍ବନ ଆଡ଼କୁ ଆଗେଇ ନେବ ଏବଂ ସମାଜରେ ସମାନତା ଓ ସମୃଦ୍ଧିର ଏକ ନୂଆ ଅଧ୍ୟାୟ ରଚନା କରିବ।
ଅଧିକ ସୂଚନା ପାଇଁ www.http//thesatyayug.in କୁ login କରନ୍ତୁ
ଖବରକୁ share କରି, ଆମକୁ ଉତ୍ସାହୀ କରନ୍ତୁ
